០៣៩ ៙ សរសើរធម៌ ៚

០១.	បពិត្រព្រះគុណព្រះករុណ	គង់អាសនាដ៏ថ្កើងថ្កាន
	ស័ក្តិសមរម្យទមមេត្តាបាន	នាំរឿងនិទានឥតមានខ្លះ ។
០២.	ឧិះឱព្រះគុណថ្លៃបរិសុទ្ធ	ជាសាវ័កពុទ្ធព្រះជាម្ចាស់
	ទ្រង់ប្រោសប្រទានធម៌ច្បងច្បាស់	តាមពុទ្ធដីកាព្រះទេសនា ។
០៣.	ញ៉ាំងចិត្តសន្តានសត្វនានា	ដែលមានអវិជ្ជានិងតណ្តា
	កិលេសរួមរឹតឥតឧបមា	បានភ្លឺជ្រះថ្លាទាំងប្រុសស្រី ។
០៤.	គឺគុណអានុភាពព្រះករុណ	ទ្រង់ត្រាស់ទេសនាប្រោសប្រណី
	តាមពុទ្ធភាសិតបទបាលី	បានជាសេចក្តីដោយបរមត្ថ ។
០៥.	ញែកដោយសណ្ឋានតាមថ្នាក់ធម៌	ធម៌ណាដែលល្អមានសង្កាត់
	វែកញែកដោយឡែកគ្មានវិបត្តិ	ពិរោះពេកពិតឥតសង្សស័យ ។
០៦.	ហេតុតែព្រះគុណចេះឆ្លាស់ឆ្លៀត	ធម៌ណាចង្អៀតចេះកែខៃ
	ញែកចែកបានច្បាស់អស់សង្ស័យ	បញ្ញាទន់ខ្ចីគង់ស្តាប់បាន ។
០៧.	ពិរោះសាច់ធម៌ដ៏ប្លែកៗ	ពិរោះពន់ពេកគ្រប់សន្តាន
	ទោះបីអ្នកល្ងង់គង់ភ្ញាក់ប្រាណ	បានរស់សាច់ធម៌ផ្អែមប្រៀបគ្មាន។
០៨.	នាកាលសម្តេចព្រះភគវា	ស្តេចគង់ធម្មាប្រោសប្រទាន
	ព្រះធម៌នាំសត្វទៅនិព្វាន	រាប់ម៉ឺនសែនលានស្ទើរគ្មានសល់។
០៩.	ព្រះអង្គប្រោសសត្វសព្វសកល	បានលុះមគ្គផលសល់តិចគ្នា
	ម្លេះកាលសម្តេចព្រះភគវ័ន្ត	កន្លងរយពាន់ឆ្នាំនានា ។
១០.	នៅតែសាវ័កព្រះឈ្នះមារ	ទេសនាធម្មាពិរោះក្រៃ
	មិនមែនសាវ័កអង្គឯណា	គឺព្រះករុណាទេសន៍ថ្មីៗ ។
១១.	បញ្ចប់ឯវំសង្ខេបខ្លី	យើងខ្ញុំប្រុសស្រីស្តាយណាស់ណា
	មិនទាន់អស់ចិត្តនឹងសាច់ធម៌	ចង់ឃាត់អង្វរមិនហ៊ានថា ។
១២.	ឃើញនឿយព្រះកាយព្រះករុណ	សូមសាធុកាចប់សេចក្តី
	ហត្ថខ្ញុំទាំងគូផ្ចង់ប្រណម្យ	លើកឡើងបង្គំគុណកែវបី
១៣.	ព្រះពុទ្ធព្រះធម៌ព្រះសង្ឃថ្លៃ	សូមបានសិរីដូចប្រាថ្នា
	ខ្ញុំសូមខមាទោសទាំងឡាយ	ក្រែងឆ្គងដោយកាយឬវាចា
	នៅមានគ្រោតគ្រាតក្នុងធម៌ណា	ដូចមានគាថាចប់ហើយហោង ៕

(រួចចាប់សូត្រ   ឧទ្ទមង្គេន ...................ភ្លាមតែម្តង)

ដកស្រង់ចេញពីសៀវភៅ:   គិហិប្បតិបត្តិ ឃរាវាសធម៌ ៚