០៣៧ ៙ អារាធនាធម្មកថិកសំដែង ធម៌ទេសនា ៚

០១.	អហំរីខ្ញុំម្ចាស់	សូមឱកាសក្រាបប្រណិប័តន៍
	ដល់អស់ពួកបរិស័ទ	ដែលលះកាត់ក្តីកង្វល់ ។
០២.	ហើយមកប្រជុំគ្នា	ព្រោះប្រាថ្នាយកកុសល
	ហេតុនេះសូមដំកល់	តាំងចិត្តស្តាប់ធម៌ទេសនា ។
០៣.	ដើម្បីជាការបុណ្យ	នេះជាគុណច្រើនណាស់ណា
	អំណាចស្តាប់ទេសនា	ដោយជ្រះថ្លាក្នុងសន្តាន ។
០៤.	សូមតាំងចិតឲ្យស្អាត	ខ្ញុំអារាធនាថ្កាន
	និមន្តលោកនិទាន	ទេសន៍ទូន្មានយើងរាល់គ្នា ។
០៥.	ហេតុនេះពុទ្ធបរិស័ទ	ដែលប្រណិបត័ន៍គាល់ត្រៀបត្រា
	កុំពោលកុំចរចា	និយាយគ្នាបែរមុខក្រោយ ។
០៦.	សូមផ្ចង់នូវសញ្ញា	ផ្ទៀងសោតាស្តាប់កុំធ្លោយ
	ទើបនឹងបាលផលសោយ	អានិសង្សប្រាំប្រការ​ ។

ដកស្រង់ចេញពីសៀវភៅ:   គិហិប្បតិបត្តិ ឃរាវាសធម៌ ៚