០៧៥ ៙ ធម៌ប្រាថ្នាសូមជួបព្រះធម្មិក ៚

០១	ឧកាសអហំរីយើងខ្ញុំ	ឱនបង្គំប្រណមនឹក
	សូមទាន់ព្រះធម្មិក	ស្តេចចេញលើកព្រះសាសនា។
០២	ព្រះធម៌ប្រាំបីម៉ឺន	បួនពាន់ច្រើនក្រៃណាស់ណា
	នៅអង្គព្រះតថា	ព្រះសាសនាអម្ចាស់ថ្លៃ។
០៣	ព្រះអង្គអាសូរសត្វ	លំបាកក្តាត់ណាស់សព្វថ្ងៃ
	តើនចេញចាកឆាប់វៃ	យាងព្រះបាទចេញប្រោសសត្វ។
០៤	ខ្ញុំសូមសេចក្តីសុខ	រួចពីទុក្ខរួចពីភ័យ
	សូមទានព្រះម្ចាស់ថ្លៃ	សូមបានទាន់ហែព្រះអង្គ។
០៥	នមោពុទ្ធាយៈ	លើកដៃដាក់លើសិរសា
	បង្គំគុណមាតា	គុណបិតាទាំងពីរពង្ស។
០៦	ពុទ្ធាស្តេចទ្រង់ធម៌	យសោតសល់ព្រះសិរអារ្យ
	មេត្រីស្រីសម្មា	ចាំសាសនាប្រាំបីម៉ឺន។
០៧	គុណព្រះកុមេរុរាជ	មានអំណាចលើលោកា
	គង់ចាំព្រះសាសនា	សូមក្សត្រាទ្រង់ឈ្វេងយល់។
០៨	មើលអស់និស្ស័យសត្វ	ណាប្រតិបត្តិនឹកដើមដល់
	សូមលោករំពឹងយល់	សូមកុសល់ឲ្យសុខសាន្ត។
០៩	សូមរួចចាកស្រេកឃ្លាន	កុំបីមានចង្រៃរោគ
	ឱ!អស់គ្នាយើងអើយ	កុំព្រងើយខំរៀនយក។
១០	ព្រះធម៌ពុទ្ធពន្លក	ស្តេចយាងមកលើកសាសនា
	មនុស្សសត្វផងលិចលង់	ខំហែលក្នុងទីជលសារ។
១១	ខំហែលពុំរួចណា	សូមក្សត្រាជួយចម្លង
	ឈ្មោះណាដែលតាំងធម៌	សូមបានដល់សុខសួគ៌ផង។
១២	ពិតជានឹងបានឆ្លង	ដល់និព្វានប្រាកដហោង៕

ដកស្រង់ចេញពីសៀវភៅ:   គិហិប្បតិបត្តិ ឃរាវាសធម៌ ៚